Kortpad-caesarslaai

’n Italiaanse sjef, Caesar Cardini, het in die 1920’s in Amerika met hierdie kombinasie vorendag gekom. Die geheim lê in die sous – ’n mayonnaise-tipe slaaisous wat so goed werk op vars krakerige slaaiblare. Dis eintlik tradisie om die blare heel te hou en die slaai met jou hande te eet, so moedig gerus jou gaste aan; dit beteken minder skottelgoed vir jou ook!

Ceasarslaai-nuusbrief

Resep deur Ilse van der Merwe – www.diekosvos.co.za

Genoeg vir 4

Vir die slaaisous (kortpad-metode)

  • 125 ml mayonnaise
  • 15 ml gerasperde parmesaankaas
  • 15 ml ekstrasuiwer olyfolie
  • 15 ml Dijonmosterd
  • 5 ml Worcestersous
  • 1 knoffelhuisie, fyngerasper
  • 1 of 2 ansjovisfilette, fyngekap
  • 15–30 ml warm water
  • sout en peper

Sit al die bestanddele in ’n lang, regop houer en verwerk goed met ’n staafmenger (of klits met die hand). Voeg meer water by indien die sous te dik is; dit moenie te loperig wees nie, maar dunner as mayonnaise. Hou eenkant.

Vir die slaai

  • 1 pak vars heel bindslaai of Little Gem-blaarslaai
  • 1 pakkie croutons (die meeste supermarkte verkoop dit – kyk in die varskruieafdeling)
  • ’n handvol parmesaankaas, in fyn skywe gesny (gebruik ’n groenteskiller)
  • 3–4 gekookte eiers, afgedop en in skywe gesny (opsioneel)
  • ansjovisfilette (opsioneel)

Was die blare onder lopende koue water en dreineer goed. Rangskik die blare op ’n dienbord en pak dan die croutons, parmesaankaas, eier en ansjovis bo-op. Bedruip mildelik met die sous en sit dadelik voor.