Allemanspaella

Hierdie eenpoot- Spaanse gunsteling hoef nie in ’n spesiale pan voorberei te word nie; jy kan ’n gewone braaipan gebruik. Dit hoef ook nie jou sak te ruk met duur spesiale rys, garnale en ander seekos nie. Die eerste paellas is destyds gemaak met haasvleis of wilde voëls, so hoender is ’n algemene bestanddeel. ’n Stukkie chorizo en gerookte paprika verleen baie diepte.

Kortpadpaella-nuusbrief

Resep deur Ilse van der Merwe – www.diekosvos.co.za

  • 30 ml olyfolie
  • ½ ui, fyngekap
  • 2 knoffelhuisies, fyngekap
  • ½ tamatie, in blokkies gesny
  • ongeveer 100 g chorizo, vel verwyder en in fyn skywe gesny
  • 10 ml gerookte paprika (gebruik gewone paprika as jy nie gerookte paprika kan kry nie)
  • 3–4 mediumgroot hoenderborsies, in dun repe gesny
  • 1 koppie wit rys (soos Saman of Bonnet)
  • 1 liter hoenderafreksel (2 aftrekselblokkies opgelos in kookwater)
  • ½ koppie gevriesde ertjies
  • ’n handvol gekapte pietersielie of koljanderblare
  • vars suurlemoenskyfies, vir voorsit
  • sout en peper na smaak

1. Verhit die olie in ’n groot braaipan (ongeveer 30 cm). Braai die uie, knoffel, tamatie en chorizo oor matige hitte tot die uie sag en die chorizo effens bruin is.

2. Voeg die paprika by en braai vir nog ’n minuut.

3. Voeg die hoender by en braai om dit effens kleur te gee (net ’n minuut of twee).

4. Strooi die rys egalig oor die pan se oppervlak, en gooi dadelik ongeveer ’n koppie aftreksel bo-oor. Moenie te veel roer nie; draai die hitte af sodat dit net-net prut. Kook sonder ’n deksel vir ongeveer 15 minute; gooi aftreksel by elke keer dat die mengsel begin droog lyk.

5. Toets of die rys gaar is (dit moet net-net nog ’n byt hê), strooi die ertjies oor en sit ’n deksel op (of bedek met foelie). Draai die hitte tot op die laagste en stoom vir ongeveer 2–3 minute. Verwyder die foelie, strooi die pietersielie of koljander oor en geur met vars suurlemoensap.

6. Sit die paella in die pan voor (gaste kan daaruit skep), met ekstra suurlemoenskyfies na smaak.

Let wel: Die paella moenie droog wees nie, maar moenie swem in sous nie. Dit moet effens minder souserig wees as risotto. Indien jou rys nog nie gaar is nie, maar al die aftreksel is geabsorbeer, gooi ’n bietjie kookwater bo-oor en kook ’n bietjie langer.