Hoe kan ek my kuierplek geriefliker maak vir gaste?

Navorsing in klein groepe het getoon mense hou daarvan om oorkant mekaar, en teen ‘n effense hoek, te sit wanneer hulle gesels. Ons oervoorouers het instinktief geweet hulle kan ure lank lekker kuier as hulle in ‘n kringetjie om die vuur sit, skerts die dekorkenner Jeanne-Marie Lombard.

Maar ons kubusvormige moderne huise leen hulle nie juis tot sirkelvormige meubelrangskikking nie. ‘n U-vormige rangskikking is nader aan die tradisionele sirkel waar almal mekaar maklik kan sien, en is dus geselliger. L-vormige meubelgroeperings neig na ‘n halwe sirkel en is minder ideaal as die U-groepering. Maar waar ruimte beperk is, is dit dikwels die enigste moontlikheid. Die rangskikking word gewoonlik deur ‘n groot meubelstuk soos die rusbank geanker en met kleiner stoele en tafels aangevul om ‘n gebalanseerde effek te skep. Die belangrikste vereiste in ‘n woonvertrek is dat die meubels gemaklik moet wees. Rangskik die sitplekke gesellig naby mekaar, maar met genoeg ruimte tussenin vir maklike verkeersvloei. Die geselsdeel sluit die rusbank, stoele en koffie- en sytafels in en moenie groter as 2 m tot 3 m in deursnee wees nie. Dié afstand laat mense toe om met gemak gesigsuitdrukkings en liggaamstaal te sien en te hoor.

Hou ook die volgende wenke in gedagte:

• ‘n Sytafel is noodsaaklik sodat gaste hul glase of bekers daar kan neersit. Dié tafel moet ongeveer dieselfde hoogte as die armleuning wees, terwyl ‘n koffietafel nie hoër as die sitplekke moet wees nie.
• Verdof ligte met dempskakelaars om ‘n gesellige atmosfeer te skep. Vul dit aan met poele lig van tafel- of staanlampe, of kies kerse vir ekstra atmosfeer.
• Hou in die winter sagte, warm kombersies byderhand sodat gaste nie klappertand aan hul rooiwyn sit en teug nie.

Hoe kies ek ‘n fokuspunt?

Die meeste woonkamers het minstens een of selfs meer fokuspunte. Dit kan wissel van ‘n kaggel of ‘n treffende kandelaar tot ‘n groot venster. As jou vertrek nie ‘n “ingeboude” fokuspunt het nie, is dit maklik om een te skep met ‘n groot kunswerk of groep foto’s (sien ook bladsy 28 in Tuis, Maart 2009). Die huiseienaars het op ‘n vakansie in die Kruger-wildtuin op dié skildery verlief geraak en dit net daar gekoop. Tuis gekom, kon hulle nie ‘n geskikte plek kry om dit te hang nie. Met die hulp van die binneontwerper Ferdi Louw van Pulse Interiors in Pretoria is dit as fokuspunt in die woonkamer ingespan. Dit bepaal nou ook die tema in die vertrek – neo-natuurlik. Dié styl word gekenmerk deur optelgoed uit die natuur, soos klippe, stokke, voëlneste en beendere. Onthou, omdat die fokuspunt die karakter van die vertrek bepaal, moet dit juis jou gunsteling-artikel wees.y

Waar moet ek my rusbank plaas as die vertrek ‘n groot venster het?

In ‘n ideale ruimte staan die bank teenoor die venster sodat almal die uitsig kan geniet en nie in ‘n muur vaskyk nie, sê die dekorkenner Chris Weylandt. In binneversiering is dit altyd belangrik om te verseker dat binne- en buiteruimtes gerieflik aaneenskakel. Ons woon in ‘n pragtige land met ‘n wonderlike klimaat – plaas meubels so dat jy die beste uit die omgewing put. As die vertrek veral bedags gebruik word, is dit ekstra belangrik om gerieflike sitplek met ‘n uitsig te hê. Plaas ‘n lang, lae ottoman of twee los stoele voor die venster en gee ‘n gemaklike rusbank die ereplek teen die oorkantste muur.

Hoe kies ek die beligting?

Omdat woonvertrekke vir meer as een aktiwiteit gebruik word, is dit belangrik om ‘n kombinasie van beligting te kies. Algemene beligting soos ligtoebehore in die plafon en hangligte is nodig vir televisie kyk, terwyl taakbeligting soos ‘n tafellamp vereis word vir lees of handwerk, en aksentbeligting soos kolligte fokuspunte soos ‘n kaggel of boekrak beklemtoon. Hou ook simmetrie in gedagte, wat help om ‘n samehangende voorkoms te skep – sien die twee hangligte van vlekvrye staal in dié vertrek. Oorweeg gerus verdofskakelaars waarmee jy die beligting vir elke stemming en aktiwiteit kan beheer. Moet ook nie natuurlike lig in die vorm van ‘n daklig of groot venster vergeet nie – dit skep bedags ‘n heerlike oop en lugtige gevoel.

Hoe skep ek ‘n neutrale vertrek?

Die natuurlike kleure, meubels en bykomstighede voer die klassieke neutrale tema regdeur die leefvertrek. Neutrale kleure werk goed, want dit skep ‘n rustige, aardse voorkoms. Voeg verskillende skakerings van beige, room en naaswit bymekaar om diepte te skep. Wit mure en vloere plaas die klem op die neutrale meubels. Die oorgooidekens en los strooikussings skep tekstuur – noodsaaklik om warmte aan ‘n neutrale vertrek te verleen. Swart is ook ‘n neutrale kleur, maar word as aksent ingespan en versterk die kaggel as fokuspunt. Beligting is belangrik in ‘n vertrek met ‘n neutrale kleurskema. Hier versterk heelwat natuurlike lig die rustige voorkoms, terwyl die versonke ligte en tafellamp bydra tot ‘n kalm stemming. En as jy tevrede is met jou neutrale basis, rond die vertrek af met bykomstighede soos boeke en vase in jou persoonlike styl.